Drishyam 3 : ‘దృశ్యం’ ఫ్రాంచైజీకి ఉన్న ఆదరణ తెలుగు ప్రేక్షకులకు ప్రత్యేకంగా చెప్పనక్కర్లేదు. మలయాళంలో విడుదలైన అసలు వెర్షన్ ఆధారంగా తెరకెక్కిన తెలుగు (వెంకటేశ్), హిందీ (అజయ్ దేవగణ్), రెండు భాగాలు భారీ విజయాలు సాధించాయి. ఇక తాజాగా ‘దృశ్యం 3’ (Drishyam 3) తెరకెక్కనుందనే విషయాన్ని మలయాళ దర్శకుడు జీతూ జోసెఫ్ ప్రకటించారు.
Drishyam 3 Movie Updates
ఈ నేపథ్యంలో ఆసక్తికరమైన వార్తలు వినిపించాయి. మలయాళంలో ఒక కథతో తీస్తే, హిందీలో మరో కథ తీస్తున్నారని ప్రచారం జరిగింది. అయితే ఈ అంశంపై తాజాగా జీతూ జోసెఫ్ స్పష్టత ఇచ్చారు.
‘‘దృశ్యం 3’ సినిమాను ఒకే కథతో మలయాళ, తెలుగు, హిందీ భాషల్లో తెరకెక్కించనున్నాం. భాషలన్నింటిలో ఒకేసారి షూటింగ్ చేయడం కుదరకపోయినా, రిలీజ్ మాత్రం మూడు భాషల్లోనూ ఒకే రోజున చేస్తాం. ప్రస్తుతం స్క్రిప్ట్ పనులు కొనసాగుతున్నాయి. పూర్తయ్యాక హిందీ వెర్షన్కు సంబంధించి టీమ్కి కథను అందిస్తాం. అక్కడి పరిస్థితులకు తగ్గట్టుగా వారు కొన్ని మార్పులు చేసుకోవచ్చు’’ అని జీతూ వెల్లడించారు.
ఇక తెలుగులో ‘దృశ్యం 3’ లో వెంకటేశ్ నటించనున్నారా లేదా అన్నది ఇంకా అధికారికంగా వెల్లడించాల్సి ఉంది. మలయాళ వెర్షన్లో మోహన్లాల్, హిందీలో అజయ్ దేవగణ్ కథానాయకులుగా రెండో భాగాల్లో నటించారు. మలయాళంలో రెండు భాగాలకు జీతూ జోసెఫ్ స్వయంగా దర్శకత్వం వహించగా, తెలుగులో, హిందీలో వేర్వేరు దర్శకులు బాధ్యతలు చేపట్టారు.
ఇప్పటికే రెండో భాగం పెద్ద విజయం సాధించిన నేపథ్యంలో, మూడో భాగంపై అభిమానుల్లో భారీ అంచనాలు నెలకొన్నాయి. మూడు భాషల్లో ఒకే కథతో, ఒకే రోజు విడుదల చేస్తామన్న ప్రకటన వీటిని మరింత పెంచింది.
Also Read : Maniratnam Stable : కమల్ ‘థగ్ లైఫ్’ సినిమా పరాజయంపై మొదటిసారి స్పందించిన డైరెక్టర్