Ahmedabad Plane Crash : అహ్మదాబాద్లో ఇటీవల జరిగిన భయంకరమైన విమాన ప్రమాదంలో సుమారు 270 మంది ప్రాణాలు కోల్పోయిన విషాద ఘటన చోటుచేసుకుంది. ఈ ఘటనలో మృతదేహాలు తీవ్రంగా కాలిపోయి, గుర్తింపు అసాధ్యంగా మారింది. దీంతో అధికారులు DNA పరీక్షల ఆధారంగా గుర్తింపు ప్రక్రియను చేపట్టి, కుటుంబ సభ్యులకు మృతదేహాలు అప్పగిస్తున్నారు.
Ahmedabad Plane Crash – Gujarat Director Dead
ఈ ప్రమాదానికి సంబంధించి గుజరాతీ మ్యూజిక్ ఆల్బమ్ డైరెక్టర్, సినీ దర్శకుడు మహేష్ జీరావాలా (Mahesh Jirawala) (అసలు పేరు మహేష్ కలవాడియా) మిస్సింగ్ కావడం గమనార్హం. తొలుత అతను అపహృతుడై ఉండొచ్చన్న అనుమానాలు వ్యక్తమయ్యాయి. అయితే అతని యాక్టివా స్కూటర్ మరియు మొబైల్ ఫోన్ ప్రమాద ప్రాంతానికి 700 మీటర్ల దూరంలో కనుగొనడం, DNA నమూనాల ఫలితాల్లో ఆయన మృతదేహం గుర్తించబడడం వల్ల ఈ మిస్టరీ విషాదంగా ముగిసింది.
మహేష్ భార్య హేతల్ ఇచ్చిన సమాచారంతో పోలీసులు DNA నమూనాలను సేకరించారు. తొలుత వారి కుటుంబం DNA ఫలితాలను నమ్మక పోయినా, పోలీసులు స్కూటర్ నంబర్, మొబైల్ లొకేషన్, DNA రిపోర్ట్ వంటి ఆధారాలు చూపిన తర్వాత మహేష్ మృతి చెందిన విషయాన్ని వారు కచ్చితంగా అంగీకరించాల్సి వచ్చింది.
మహేష్ జీరావాలా నరోడా నివాసి. గుజరాతీలో అనేక మ్యూజిక్ వీడియోలు రూపొందించిన ఆయన, 2019లో ఒక సినిమా కూడా దర్శకత్వం వహించారు. ఆయనకు భార్యతో పాటు కుమారుడు, కుమార్తె ఉన్నారు. “మహేష్ జీరావాలా ప్రొడక్షన్స్” అనే నిర్మాణ సంస్థకు CEOగా వ్యవహరిస్తున్నారు.
ఈ ప్రమాదంలో ఇప్పటివరకు 231 మంది DNA గుర్తింపులు పూర్తయ్యాయి. 210 మృతదేహాలు వారి కుటుంబ సభ్యులకు అప్పగించబడ్డాయి. మృతుల్లో 155 మంది భారతీయులు, 36 మంది బ్రిటిష్ పౌరులు, 7 మంది పోర్చుగీస్, ఒక కెనడియన్ మరియు 9 మంది స్థానికులు ఉన్నారు. ఈ విషాదకర ఘటన దేశవ్యాప్తంగా శోకం నింపగా, మహేష్ జీరావాలా కుటుంబానికి ఇది తీరని లోటుగా మిగిలింది.
Also Read : Nagababu Shocking Comments : కూతురు నిహారిక పెళ్లిపై నాగబాబు కీలక వ్యాఖ్యలు